f Member consumers ng COTELCO sa lungsod mabibigyang muli ng electric subsidy | City of Kidapawan

Month: November 2018

You are here: Home


thumb image

PRESS RELEASE
November 27, 2018
Member consumers ng COTELCO sa lungsod mabibigyang muli ng electric subsidy
KIDAPAWAN CITY – MAGANDANG BALITA PARA sa mga COTELCO member consumers ng Kidapawan City.
Ibabawas na sa billing para sa buwan ng December 2018 ang babayaran sa Cotabato Electric Cooperative ang subsidy para sa tinatayang 29,000 households sa lungsod.
Inanunsyo ni City Mayor Joseph Evangelista ang naturang development sa unang araw ng serye ng kanyang consultations sa mga purok leaders ng Poblacion Kidapawan City November 27, 2018.
Nagmula ang subsidy sa share ng Kidapawan City mula sa Energy Development Corporation sa pagpapatakbo nito ng Mt. Apo Geothermal Plant.
Huling nagbigay ng electric subsidy ang City Government noon pang 2015.
Cash itong ibinigay noong mga panahong iyon, ayon pa kay Mayor Evangelista.
Otomatikong ibabawas na ang bagong electric subsidy sa December bill ng bawat member consumer na kanyang babayaran sa COTELCO sa January 2019, paliwanag pa ng alkalde.
Ginawa ito upang hindi na maabala pa ang bawat member consumer ng COTELCO sa Kidapawan City.
Mula 2015-2017 ang sakop ng electric subsidy.
P340.75 ang mababawas sa electric bill ng member consumer kung siya ay miyembro na ng COTELCO sa taong 2015 pababa.
P222.53 Naman ang itatapyas sa COTELCO bill kung 2016 nagpakabit ng linya ng kuryente at P93 naman kung 2017 na naging miyembro ng COTELCO.
Ang halaga ng electric subsidy ay nakadepende sa kung ilang buwan na aktibo ang electric connection ng isang consumer.
Tumaas ng pitong libong households ang bilang ng nakabitan ng linya ng kuryente sa lungsod mula 2015.
Nakatulong ang National Intensified Household Electrification – NIHE Project kung saan ay nagkaroon ng linya ng kuryente yaong mga tahanan sa mga malalayong lugar sa mga barangay ng Kidapawan City.##(CIO/LKOasay)

Photo Caption – PUROK CONSULTATION NI MAYOR EVANGELISTA: Masayang kinakausap ni City Mayor Joseph Evangelista ang ilang purok leaders ng Brgy Poblacion na dumalo sa consulation ng alkalde November 27, 2018.Inanusnyo i Myor Evangelista sa aktibidad na ito ang pamimigay ng electric subsidy sa lahat ng members consumers ng COTELCO sa Kidapawan City.Ibabawas ang subsidy sa December 2018 bill ng bawat member.(CIO Photo)

thumb image

PRESS RELEASE
November 27, 2018
MKWD-Magpet Boundary road maliwanag na pagsapit ng gabi
KIDAPAWAN CITY – MALIWANAG AT LIGTAS NA PARA SA LAHAT ang pagdaan sa Metro Kidapawan Water District –Kidapawan City Magpet Boundary road pagsapit ng gabi.
November 26 ng gabi ng i-switch on ni City Mayor Joseph Evangelista at ng COTELCO ang may 135 units ng streetlights sa lugar.
Bahagi ng Public Safety Program ang nabanggit na pet project ni Mayor Evangelista.
Makakatulong ng malaki ang streetlights sa kampanya kontra krimininalidad at kaligtasan ng mga motorista sa daan.
Nagkakahalaga ng mahigit sa P6.7 Million ang isangdaan at tatlumpo’t limang 110 Watts LED streetlights na inilagay ng City Government sa lugar.
Ilan lamang ito sa iba pang streetlighting projects na ipinatutupad ng City Government sa kasalukuyan.
Nariyan ang P3M na streetlight project sa Barangay Magsaysay to Barangay Junction na proyektong magbibigay liwanag sa gabi sa daan patungo ng munisipyo ng M’lang.
Naipatayo na ang may 58 poste ng ilaw sa nabanggit na lugar.
Sa katapusan ng buwan ng Disyembre 2018 ay inaasahang sisindi na ang lahat ng pailaw mula Magsaysay hanggang Junction.
Patuloy naman ang paghuhukay sa pagtatayuan ng poste ng may 131 streetlights na ilalagay ng City Government mula Crossing Binoligan hanggang sa hangganan ng Kidapawan City at President Roxas.
Nagkakahalaga ng mahigit sa anim na milyong piso ang nabanggit na proyektong pailaw.
Pinondohan ng 20% Economic Development Fund ang mga nabanggit na streetlighting projects.
Samantala, magsasagawa na ng public bidding ang City Government para naman sa mahigit P5 Million na streetlighting project na magkokonekta mula Barangay Balindog tungo sa boundary ng Kidapawan-City-Matalam sa Barangay Patadon.
Nagmula ang P5 Million sa Performance Challenge Fund na premyo ng City Government sa pagkamit nito ng Seal of Good Local Governance o SGLG mula sa Department of the Interior and Local Government.
115 units ng streetlights ang ilalagay sa nabanggit na lugar.
Sa pamamagitan nito ay magliliwanag na ang buong kahabaan ng National Highway ng Kidapawan City mula sa Landmark sa boundary nito sa Munisipyo ng Makilala hanggang sa hangganan sa bayan ng Matalam sa Barangay Patadon simula sa 2019.##(CIO/LKOasay)

thumb image

Congratulation to us!
KIDAPAWAN CITY – 5TH MOST COMPETITIVE CITY IN MINDANAO FOR 2018 AS VALIDATED BY THE NATIONAL COMPETITIVE COUNCIL OF THE PHILIPPINES.

thumb image

PRESS RELEASE

November 26, 2018

Tricycle seminar at inspection sa December 4, 5, 6 at 7 2018

KIDAPAWAN CITY – MAAGANG GAGAWIN sa December 4,5,6 at 7 2018 ang seminar at inspection ng lahat ng tricycle na bumibyahe sa lungsod

Ipinag-utos ni City Mayor Joseph Evangelista ang pagsasagawa ng maagang seminar at inspection upang hindi na mahihirapan pa ang mga operators at drivers sa renewal ng kanilang tricycle franchise pagsapit ng January 2019.

Mandatory na para sa mga hindi pa nagpapakulay ng ‘off white’ ang pagpipintura ng kanilang units, ayon na rin sa Traffic Management Unit.

Gagawin ng TMU at City Tricycle Franchising Regulatory Board o CTFRB ang seminar at inspection.

Alinsunod na rin sa unified color coding scheme sa taong 2020 kung saan inaasahang 100% ng kulay puti ang lahat ng 3500 tricycles na bumibyahe sa Kidapawan City.

Ganito rin sa mga units na ‘kupas’ na ang kanilang pinturang puti na kinakailangang magpadagdag ng kulay sa kanilang tricycle, dagdag pa ng TMU.

Maliban sa kulay puti, dapat din na gumagana ang mga passenger, signal at break lights; may garbage receptacle sa loob ng unit, maayos ang mga upuan at siyempre, kumpleto ang dokumento gaya ng franchise, OR/CR ng motor at dapat may professional driver’s license ang mismong tsuper.

Narito ang mga schedules:

December 4 8:30 am at 1:00 pm para sa lahat ng rutang KD-1.

December 5 8:30 am para sa lahat ng KD-2,3 at 4.

December 5 1:00 pm KD-5,6 at 7.

December 6 8:30 am KD-8,9,10 at 11;

December 6 1:00 pm para sa lahat ng KD numbers na hindi pa nakaka-attend ng seminar.

December 7 8:30 am para sa lahat ng mga KD na hindi pa nakaka-seminar sa mga petsang nauna ng nabanggit.

Mangyaring dalhin ng mga operators at drivers ang kanilang pragkisa, OR/CR at Professional Driver’s License sa seminar.

Sa linggong ito na ipagbibigay alam naman ng TMU at CTFRB ang lugar kung saan gagawin ang seminar.

Wala ng extension na ibibigay pa ang City Government.##(CIO/LKOasay)

Photo Caption- UNIFIED COLOR CODING SCHEME NG MGA TRICYCLE IPATUTUPAD NA SA 2020: Dapat kulay ‘off-white’ na ang lahat ng tinatayang 3,500 bilang ng bumibyaheng tricycle sa Kidapawan City sa taong 2020. Magiging mandatory na ang pagpapakulay ng puti bilang bahagi ng rekisitos sa renewal ng tricycle franchise sa Enero 2019.(CIO Photo)

thumb image

Anim na kumanlong sa LGU house pumasa sa geologist licensure exam

Quezon City–Sa loob ng isang buwan naging kanlungan ng anim na mga Nagtapos nang Bachelor of Science in Geology ang LGU house ng Kidapawan City.

Saksi ang bahay na ito sa hirap at tagumpay nang mga batang ito habang sila ay sumailalim sa sariling review.

Dahil nagtitipid hindi ang LGU house na nasa #29 Maalindog Street, Teachers Village sa Quezon City ang naging kanilang pansamantalang tahanan nang libre.

Libre ang kuwartong matutulugan, ilaw at ang tubig. Ang tanging gastos lamang nang mga batang ito ay ang kanilang pagkain.

At matapos nga ang pagsusunog ng kilay, nagbunga ang kanilang pagsisikap.

Lahat lang naman kasi sila ay pumasa sa katatapos lang na Geologist Licensure Exams.

Dalawa sa mga ito na kinilalang sina JORRIEL TAN agod na taga Davao City ay nag TOP 2 habang taga Davao din na si KENNETH sangalang ay nag top 3.

Pumasa din ang kanilang mga kasamahan na sina ELRIC EVANGELISTA, MARLON SUELTO, GLEBZEN DEMONTEVERDE at ELY DANIEL CAMILLO.

nagpaabot naman nang taus pusong pasasalamat kay city mayor Joseph A. Evangelista ang mga bata dahil sa malaking tulong na anila ang pagtira sa LGU house para sila magtagukpay.

Ang LGU house sa Quezon City ay patunay na walang pinipiling tao ang kinakanlong nito.

Naging saksi narin ang bahay na ito sa tagumpay nang mga bata sa larangan nang edukasyon, at palakasan.

Sa mga nais na mag avail nang serbisyo ng LGU house mangyaring sumulat lamang po sa alkalde ng lungsod o kaya ay makipag ugnayan lang kay Ms. Maria Magdalena Bernabe ng City Human Resource and Management Office sa city hall. (Williamor A. Magbanua)

Photos: Joriel Tan Agod ( sando Top 2) and Marlon Suelto of compostella province.

thumb image

 

PRESS RELEASE

November 22, 2018

Day Care Centers malaki ang nai-ambag sa tamang paglaki ng mga bata sa lungsod

KIDAPAWAN CITY – BINIGYANG PAGPUPUGAY NG CITY Government ang mahahalagang papel ng isandaan at pitong day care centers ng lungsod sa pagdiriwang ng Children’s Month.

Sa day care center pa lang kasi ay natuturuan na ng magandang asal ang bawat bata para sa kanyang tamang paglaki, mensahe pa ni City Mayor Joseph Evangelista sa okasyon.

Ipinarating niya ito sa pamamagitan ni City Councilor Marites Malaluan na Chair ng SP Committee on Health na panauhing pandangal sa ginanap na Children’s Congress November 22, 2018.

Malaki ang naging ambag ng mga day care workers sa pagsegurong nahuhubog ng tama ang mga bata edad 3 -4 years old bago pa man sila makatungtong sa formal schooling na nagsisimula sa kindergarten.

Nakapaloob ang pagkakaroon ng day care centers sa Right to Development and Participation ng mga bata.

Pinagtuto-unan din ng ibayong pansin ng City Government ang Right to Survival ng mga bata sa pamamagitan ng mga supplemental feeding programs sa mga public schools upang masawata ang suliranin sa malnutrisyon.

Katunayan, may mga libreng programa ang City Government para sa mga inang buntis upang masegurong malusog at ligtas ang mga bata habang ipinagbubuntis pa lang sa ilalim ng Maternal and Child Care and Wellness Program.

Sa usapin naman ng Right to Protection, saklaw nito ang pagpo-protekta sa mga bata laban sa alin mang uri ng pananakit, pang-aabuso at eksploytasyon.

Nariyan ang mga Barangay Councils for the Protection of Children na siyang inatasan na pagsegurong protektado ang mga bata sa komunidad.

Sa usapin naman ng mga Children in Conflict with the Law o CICL, may inilaang Drop In Center ang City Government na nagsisilbing pansamantala nilang tirahan.

Dito ay tinuturuan ang mga CICL na magbago at maging produktibo sa nabanggit na pasilidad sa pangangalaga ng City Social Welfare and Development Office.##(CIO/LKOasay)

Photo Caption – CHILDREN’S MONTH IPINAGDIRIWANG SA LUNGSOD: Ipinarating ni City Councilor Marites Malaluan, SP Committee Chair on Health ang mensahe ni City Mayor Joseph Evangelista sa okasyon.Pangunahing adhikain ng City Government ang pagsusulong ng mga programang pambata sa layuning gawing Child Friendly ang Kidapawan City.(CIO Photo)

thumb image

 

PRESS RELEASE

November 22, 2018

City Gov’t at DSWD 12 namigay ng tulong pinansyal sa mga maralitang apektado ng TRAIN Law

KIDAPAWAN CITY – MAGKA-AGAPAY NA iniabot ng City Government at Department of Social Welfare and Development Regional Office 12 ang P2,400 na tulong pinansyal para sa mga maralitang benepisyaryo ng Pantawid Program ng Pamahalaan.

Nakapaloob ang tulong sa ilalim ng Conditional Cash Assistance na para sa mga member beneficiaries ng Pantawid Pamilyang Pilipino Program o 4P’s sa Kidapawan City at kalapit na lugar.

Layun ng tulong na maibsan ang epekto ng Tax Reform Acceleration and Inclusion o TRAIN Law sa mga maralitang mamamayan.

P200 kada buwan ang ayuda na lump-sum o katumbas sa isang taon ang iniabot ng City Government at DSWD sa kamay ng bawat benepisyaryo.

Nagbaba ng utos si City Mayor Joseph Evangelista sa mga kawani ng City Social Welfare and Development Office na tulungan ang DSWD 12 sa distribusyon ng cash assistance.

Ginawa ito upang hindi mabiktima ng ‘BUDOL-BUDOL’ at mga manloloko ang mga nakatanggap ng tulong pinasyal.

Isa pa ay upang masegurong sa kamay ng member beneficiary mismo didiretso ang pera at hindi sa mga indibidwal na pinagsang-laan umano ng kanilang ATM Cards.

Naglagay din ng pulis sa mga ATM booths ng Land Bank of the Philippines ang City PNP para sa seguridad ng lahat habang binibigay ang cash assistance.##(CIO/LKOasay)

Photo caption – MGA APEKTADO NG TRAIN LAW TINULUNGAN NG GOBYERNO: Inaalalayan ng mga kawani ng DSWD 12 at City Government ang member beneficiary ng 4P’s sa pagku-kubra ng kanilang tulong pinansyal mula sa Pamahalaan. Binigay ang tulong upang maibsan ang epekto ng TRAIN Law sa mga maralitang mamamayan sa lungsod at kalapit lugar.(CIO Photo)

thumb image

PRESS RELEASE

November 19, 2018

Clearing sa lumang public cemetery maling impormasyon – City Government
KIDAPAWAN CITY – MALI ang impormasyong lumabas na ang City Government ang nag – utos na hukayin ang mga nakalibing sa lumang Public Cemetery sa Barangay Poblacion.
Mismong si City Administrator Lu Mayormita ang nagsabi nito matapos lumabas ang impormasyon na umano ay hinuhukay na ng mga kapamilya ang labi ng mga nakalibing sa lugar . Dahilan diumano ng paghuhukay ay ang planong pagtatayo ng bagong Fire Station ng BFP sa lugar na nabanggit.
Pinasinungalingan ni Mayormita ang nabanggit dahil hindi naman doon itatayo ang bagong istasyon ng pamatay sunog at walang permiso mula sa Lokal na Pamahalaan na maghukay ng mga libing sa lumang public cemetery. Ani pa ng opisyal, sa Barangay Magsaysay itatayo ang bagong Fire Station.
Unfair at maling-mali ang impormasyon na pinapayagan na ni City Mayor Joseph Evangelista na magsagawa ng paghuhukay at clearing sa lumang public cemetery.
Dapat munang humingi ng exumation permit sa City Government ang mga maghuhukay at maglilipat ng labi ng kanilang mga kaanak mula sa lumang sementeryo, giit pa ni Mayormita.
Bagaman totoong may plano ang City Government na ayusin ang naturang lugar, sa kasalukuyan ay nasa punto pa ito ng paghahanap ng mga kamag – anak ng mga nakalibing doon.
Matatagpuan sa dulo ng Bautista Street ang lumang pampublikong libingan na nagsilbing Public Cemetery noong mga nakalipas na taon na may sukat na 1,300 square meters na hindi pa nito ginagalaw at ginagamit sa ngayon ngunit dalawang taon na mahigit na pinagbabawal sa lugar ang paglagay ng mga bagong libing.##(CIO/LKOasay)

thumb image

PRESS RELEASE

November 15, 2018

Tribal leaders at barangay IPMR’s buo ang suporta kay Mayor Evangelista

KIDAPAWAN CITY – NANIWALA AT SUPORTADO NG MGA Tribal Leaders ang paliwanag ni City Mayor Joseph Evangelista sa usapin ng recall ng sasakyan at opisina ni Indigenous Peoples Mandatory Representative Radin Igwas.

Naiintindihan ng mga tribal leaders at IP Mandatory Representatives ng mga barangay na dumalo sa dayalogong kanilang ipinatawag ang dahilan ng alkalde kung bakit naglabas siya ng isang memorandum patungkol sa naturang recall.

Sa makailang pagkakataon ay ipina-unawa ni Mayor Evangelista na ang naturang recall ay upang ayusin ang sasakyan at opisina ni Igwas.

Aayusin ang Isuzu Pick Up na sasakyan upang gamitin sa pagmo-monitor ng mga IP related programs at projects sa barangay samantalang aayusin ang opisina na magsisilbing bagong Tribal Hall and Training Center.

Katunayan ay si Igwas pa mismo ang sumulat kay Mayor Evangelista na humihingi ng pondo upang isaayos ang kanyang opisina.

Sa isyu ng sasakyan, luma na at kinakailangan ng ayusin ito ng magamit din mismo ni Igwas at IP Deputy Mayor Datu Camilo Icdang upang tingnan at kumustahin ang mga proyekto ng IP’s sa mga barangay.

May nakalaan na ring isang milyong pisong budget para sa itatayong Tribal Hall and Training Center na sisimulan ng ipatutupad sa susunod na linggo, wika pa ni Mayor Evangelista.

Kapag naitayo at natapos na ang nabanggit na pasilidad ay pwede ng mag-opisina dito si Igwas kasama ang IP Deputy Mayor, paniniyak pa ng alkalde.

Sa kabila ng kontrobersya na nilikha ng nabanggit na isyu,sinabi ni Mayor Evangelista sa mga IP’s na hindi niya pine-personal si Igwas at wala rin siyang sama ng loob dito dahil pareho lang naman silang nagmamalasakit sa mga tribo.

Mahigit sa isandaang tribal leaders at IPMR’s ang dumalo sa dayalogong ginanap sa Kidapawan City Convention Hall November 15, 2018.

Inimbitahan ng mga tribal leaders si Igwas na dumalo ngunit sa hindi malamang kadahilanan ay hindi siya sumipot sa mga pag-uusap.(LKOasay)

@ 2018 Kidapawan City. All rights reserved.

Developed and Maintained by: Durian Studio