f Brgy officials hindi dapat tatamad-tamad sa kampanya kontra dengue – Mayor Evangelista  | City of Kidapawan

Month: July 2019

You are here: Home


thumb image

Brgy officials hindi dapat tatamad-tamad sa kampanya kontra dengue – Mayor Evangelista

KIDAPAWAN CITY – DAPAT HINDI TATAMAD-TAMAD ANG MGA opisyal ng barangay sa kampanya kontra dengue.
Tahasan itong sinabi ni City Mayor Joseph Evangelista sa Convocation Program ng City LGU sa patuloy na tumataas na kaso ng dengue fever sa lungsod. 
Kinakailangang magkaisa ang lahat ng opisyal pati ang kanilang mga constituents ng malabanan at mapigilan ang pagdami ng mga nagkakasakit nito, ayon pa kay Mayor Evangelista.
Dapat tuloy-tuloy ang pagpapatupad ng ABKD o Aksyon Barangay Kontra Dengue sa pamamagitan ng regular na paglilinis sa mga komunidad at tahanan ng hindi pamugaran ng mga lamok na nagdadala ng sakit.
Nasa 452 cases na ng dengue ang naitala sa Kidapawan City mula January-June 2019 kung saan ay may isa ang namatay dala ng komplikasyon nito, base na rin sa datos ng City Health Office.
Ito ay lubhang mataas kumpara sa 72 cases ng dengue na naitala sa kaparehong panahon noong 2018.
Ugaliin dapat ng lahat na linisin ang kanilang mga tahanan upang mapuksa ang mga kiti-kiti at itlog ng lamok, pagpo-protekta sa sarili ng hindi makagat ng lamok, maagang pagpapagamot sa mga duktor o health center kung sakaling may lagnat ng dalawang araw at pagsuporta sa isasagawang fogging operation kung sakaling may outbreak ng dengue sa komunidad, giit pa ni Mayor Evangelista. ##(cio/lkoasay)

thumb image

City Gov’t namigay ng relief assistance sa mga pamilyang apektado ng pagbaha

KIDAPAWAN CITY – LIMAMPUNG Pamilya na biktima ng baha mula sa iba’t-ibang lugar ng Poblacion ang nabigyan ng relief items ng City Government noong July 24, 2019.
Ipinaseguro ni City MAyor Joseph Evangelista na agad mabigyan ng tulong ang mga nasalanta ng baha matapos ang malakas na pag ulan na nagpa-apaw sa lebel ng tubig sa mga ilog at daluyan nito sa lungsod kamakalawa ng gabi.
Nanguna sa pamimigay ng tulong ang mga Deaprtment Heads ng City Disaster Risk Reduction and Management Office at City Social Welfare and Development Office.
Tumanggap ng tig-lilimang kilong bigas, at de lata na sardinas at corned beef ang bawat household na apektado ng baha, base na rin sa impormasyon ng CDRRMO.
Mga pamilya sa Purok Ponkana ng Lapu Lapu Street; Taran Subdivision, at Salandanan Subdivision ng Barangay Poblacion ang tumanggap ng tulong.
Nagmula ang relief assistance sa 5% Quick Response Fund ng CDRRMC.
Kaugnay dito ay ipasusuri ni Mayor Evangelista sa City Engineering Office ang mga binahang drainage canal na malapit sa nabanggit na mga lugar.
Ito ay upang magawan ng paraan na hindi na umapaw ang tubig at bahain ang mga residente pagsapit ng ulan. ##(cio/lkoasay)

(photo credits to Mr. Dexter C. David of CDRRMO)

thumb image

Mga negosyante hinikayat na ipasuri ang kanilang mga establisimento laban sa pinsala ng lindol

KIDAPAWAN CITY – HINIKAYAT NI City Mayor Joseph Evangelista ang lahat ng nagmamay-ari ng negosyo sa lungsod na ipasuri ang kanilang mga istruktura para maiwasang mapinsala kung sakaling magkalindol.
Hanggang ngayon kasi ay may mga aftershocks pang nangyayari sa lungsod mula ng manalasa ang Magnitude 5.6 na lindol noong July 9, 2019.
Una nang sinabi ng alkalde na ang hakbang ay upang masegurong ligtas ang lahat ng mga nasa loob at paligid ng gusaling pagmamay-ari ng mga negosyante.
Mainam din na isang Structural Engineer ang sumuri ng mga istruktura dahil ang mga ito ang mas nakakaalam kung papaano maiiwasan ang pagguho kung sakaling may lindol.
Maliban dito ay inoobliga din ang mga business owners na sumunod sa alituntunin ng National Building Code kagaya na lamang ng pagkakaroon ng accessible na emergency exits, tamang electrical at plumbing connections; pag-alis sa mga hazard na pwedeng magresulta ng aksidente, pagkakaroon ng angkop na firewall na proteksyon sa insidente ng sunog at iba pa.
Una nang pinananawagan ni Mayor Evangelista sa himpilan ng radyo ang nabanggit na hakbang.
Kaugnay nito ay nakapagtala naman ng Intensity 3 na lindol ang Kidapawan City bandang 9:20 kaninang umaga, base sa ulat ng Phivolcs.
Tinatayang nasa kalapit na bayan ng Columbio Sultan Kudarat ang sentro ng lindol.
Patuloy naman ang panawagan ng City Government sa ibayong pag-ingat ng lahat sa mga posibleng aftershocks kasunod ng lindol kaninang umaga.##(cio/lkoasay)

thumb image

Abot isang libong indigent patients nabigyan ng libreng serbisyong medikal

KIDAPAWAN CITY- ABOT SA ISANG LIBONG INDIGENT Patients ang naserbisyuhan ng dalawang araw na Libreng Medical, Dental at Ophthalmology Outreach program July 23-24, 2019.

Nagmula sa apat-napung mga barangay na nauna ng na-validate ng mga local officials ang nakabenepisyo sa programa.

Nasa ikalimang taon ng ipinatutupad ng partnership nina Mayor Joseph Evangelista at ng With Love Jan ang programa na naglalayung mabigyan ng libreng ayudang medikal ang mamamayan ng Kidapawan.

Libre na ang pagpapakonsulta, pagbibigay ng gamot, dental services gaya ng pagbunot at pagpapasta ng ngipin, laboratory services at reading eyeglasses ang ibinigay ng City Government at With Love Jan.

Nanguna sa programa sina City Legal Officer Atty Jose Paolo Evangelista, na siyang kumatawan sa kanyang ama na si Mayor Evangelista, at si With Love Jan President Dr. Bernie Miguel, MD.

May iilan din na mga walk-in clients na sumali sa aktibidad.

Maliban sa mga serbisyong nabanggit, nagbigay din ng mga tips at mahahalagang impormasyon ang mga duktor at health service providers sa kung papaanong maiingatan ng mamamayan ang kanilang kalusugan ng maka-iwas na magkasakit.

Karamihan sa mga pasyenteng nabigyan ng libreng serbisyo ay nakatatanda, mga inang nagdadalantao, mga bata at maging Persons With Disabilities.

Ginawa ang libreng Medical Outreach program sa City Gymnasium.

Sinimulang ipatupad ang programa noong July 2015.

Kapartner ng City Government at With Love Jan Foundation ang mga private medical practitioners ng Kidapawan City na libreng nagbigay ng kanilang serbisyo alang alang sa mamamayan. ##(cio/lkoasay)

thumb image

Team Kidapawan City nag uwi ng medalya mula sa Mindanao Leg Muay Thai Championships

KIDAPAWAN CITY – NAGWAGI NG LIMANG GINTO, LIMANG PILAK AT APAT NA TANSONG Medalya ang mga pambato ng Kidapawan City sa Mindanao Leg Muay Thai Association of the Philippines Championships kamakailan lang.
Nasa ikalimang pwesto ang Kidapawan City mula sa labing isang Mindanao Cities na sumabak sa nasabing torneo na ginanap sa Butuan City. 
Dalawang Teams ang kumatawan sa lungsod sa nabanggit na torneo.
Kidapawan team A sa pangunguna nina coaches Sifu Ritchies Solano at Ramel Eting at AKMA Apo Kochi Ryu Martial Arts ni Coach Augustus Guhiling.
Nakipagbakbakan sila laban sa mga Muay Thai athletes ng Davao City, Gensan, Zamboanga, Butuan at iba pang malalaking lungsod ng Mindanao.
Nagwagi ng gold sina Sofrino John Pepugal, Christian Jay Boquerin, at Jhoniel Aquino ng Kidapawan team A at Jester Cangayda ng Team Apo Kochi Ryu Martial Arts Kidapawan.
Silver medalists naman sina Chris Wilfred Dellona, Felix Alfonso Bilbao, Christian Nudalo at Vince Galon ng Kidapawan team A at si Heimweir Cangayda ng AKMA.
Bronze medal winners naman sina Carl Pajes ng Kidapawan team A at sina Xiris Shane Ayob, John William Ayob at Julie Pearl Asopre ng AKMA.
Personal silang pararangalan ni City Mayor Joseph Evangelista sa July 2019 Convocation Program ng City Government ngayong linggo tanda ng kanilang matagumpay na kampanya sa prestihiyosong torneo ng Muay Thai sa Pilipinas.
Kabilang silang lahat sa One Team, One City One Goal Sports Development Program ng Kidapawan City Government at partner agencies nito.. ##
(cio/lkoasay)

thumb image

The Working City Mayor Joseph A. Evangelista, receiving a citation from the Professional Regulation Commission (PRC) as partner in delivering the agency’s services in the countryside. Mayor Evangelista was instrumental in the establishment of the PRC Sub-Office in Kidapawan that cater as far as the provinces of Bukidnon, Maguindanao and the whole North Cotabato province as well.

thumb image

Mayor Evangelista binati ang Iglesia ni Cristo sa ika 105 taong anibersaryo

KIDAPAWAN CITY – MAINIT NA PAGBATI PARA SA IKA-ISANGDAAN AT LIMANG Taong Anibersaryo ng Iglesia Ni Cristo ang pinapaabot ni City Mayor Joseph Evangelista at buong City Government.

Ipagdiriwang ng lahat ng kaanib ng INC sa buong Pilipinas at sa ibang bansa ang kanilang 105th Founding Anniversary sa July 27, 2019.

Makakaasa ng ibayong suporta sa mga programa at adhikain ang Iglesia ni Cristo mula sa City Government, mensahe pa ni Mayor Evangelista.

Hangad din ng butihing alkalde na mas lalo pang lumago ang INC sa mga taong darating.

Kaugnay nito ay pasasalamat din ang ipinapaabot ng alkalde kasama ng kanyang kapwa City Officials sa INC sa malugod nitong pagsuporta sa kanya noong mga nakaraang eleksyon pati na rin ang pagsusulong ng mga pangunahing programa ng Lokal na Pamahalaan. ##(cio/lkoasay)

thumb image

Team Kidapawan City nag uwi ng medalya mula sa Mindanao Leg Muay Thai Championships

KIDAPAWAN CITY – NAGWAGI NG TATLONG GINTO, APAT NA PILAK AT ISANG TANSONG Medalya ang mga pambato ng Kidapawan City sa Mindanao Leg Muay Thai Association of the Philippines Championships kamakailan lang.

Nasa ikalimang pwesto ang Kidapawan City mula sa labing isang Mindanao Cities na sumabak sa nasabing torneo na ginanap sa Butuan City.

Mga miyembro ng Kidapawan City National High School at Alternative Learning System ang mga atletang kumatawan sa lungsod sa torneo.

Nakipagbakbakan sila laban sa mga Muay Thai athletes ng Davao City, Gensan, Zamboanga, Butuan at iba pang malalaking lungsod ng Mindanao.

Nagwagi ng gold sina Sofrino John Pepugal, Christian Jay Boquerin, at Jhoniel Aquino.

Silver medalists naman sina Chris Wilfred Dellona, Felix Alfonso Bilbao, Chrisitian Nudalo at Vince Galon.

Bronze medal winner naman si Carl Pajes.

Personal silang pararangalan ni City Mayor Joseph Evangelista sa July 2019 Convocation Program ng City Government ngayong linggo tanda ng kanilang matagumpay na kampanya sa prestihiyosong torneo ng Muay Thai sa Pilipinas.

Kabilang silang lahat sa One Team, One City One Goal Sports Development Program ng Kidapawan City Government at partner agencies nito.

Winning coaches ng Team sina Sifu Ritchies Solano at Ramel Eting na pararangalan din sa okasyon. ##(cio/lkoasay)

(photo courtesy of Sifu Ritchies Solano)

@ 2018 Kidapawan City. All rights reserved.

Developed and Maintained by: Durian Studio