Tricycle drivers gipahimangnuan nga dili mamikil og pasahero

You are here: Home


NEWS | 2020/01/06 | LKRO


thumb image

Republic of the Philippines

Region XII

Province of Cotabato

City of Kidapawan

CITY INFORMATION OFFICE

PRESS RELEASE

January 6, 2020

Tricycle drivers gipahimangnuan nga dili mamikil og pasahero

KIDAPAWAN CITY – “DILI MAMIKIL og pasahero”.

Kini ang simple apan mahinungdanong pahimangno sa City Government sa tanang nanag-iya ug driver sa tricycle aron makalikay nga mareklamo.

Daghan sa mga reklamo nga nakaabot sa Tricycle Adjudication Board sa City Government mao ang wala pagkasinabtanay sa driver ug pasahero, kini matud pa ni City Traffic Management Unit Head Rey Manar sa dihang gisugdan na ang seminar alang sa renewal sa permit sa mga tricycle nga nagabyahe ning dakbayan.

Gani bag-o pa man ang pahimangno ni Manar, nauna na nga gibutyag ni Atty Jose Paolo Evangelista, Acting City Information Officer ug representante ni City Mayor Joseph Evangelista sa nasampit nga seminar, nga adunay ipahimutang nga ‘hotline’ ang City Government aron maoy dangpanan sa mga reklamo batok sa mga pabadlong nga driver.

Dili pwede mo-balibad ang driver sa iyang pasahero nga musakay basta anaa lamang sa solud sa Kidapawan City ang ruta, hingpit nga pahimangno sa otoridad.

Dili sad pwede nga mo-singil sobra sa plitehan ang driver sa tricycle kay anaa may taripa nga maoy sumbanan sa saktong plitehan.

Pwede nga bawion sa mga otoridad ang permit ug prangkisa sa usa ka tricycle kung magsige na lang nga ginareklamo ang driver niini kay dili mosunod sa saktong polisiya sa City Government.

Gikinahangkan sad nga mosunod sa saktong pamalaod sa trapiko ang mga driver aron malikayan nga madisgrasya unya ang ilang mga pasahero.

Nagsugod na sa seminar ang tanang ruta nga “1” kon Poblacion.

Ginalauman nga mahuman ang seminar sa tanang ruta sa Enero 10, 2020.

Human ang seminar mao ang inspection sa mga tricyle bag-o ang pagpadagan sa ilang mga papeles alang sa renewal sa permit.##(cio/lkoasay)

Photo caption SEMINAR SA TRICYCLE GISUGDAN NA: Sila maoy pipila lamang sa kapin tres mil nga units sa tricycle nga nagabyahe ning dakbayan nga unang nipailaom sa seminar karong Enero 6, 2020.Padayon ang pahimangno sa City Government nga ayuhon nila pag abi-abi ilang mga pasahero aron malikayan ang mga reklamo diha sa Tricycle Adjudication Board.(cio photo)



@ 2018 Kidapawan City. All rights reserved.

Developed and Maintained by: Durian Studio