Month: May 2022

You are here: Home


thumb image

KIDAPAWAN CITY – PATULOY na  nananawagan ang City Government of Kidapawan sa pamamagitan ng City Health Office o CHO sa publiko na magpa booster shot na laban sa COVID-19.

Ito ay matapos makapagtala ng limang kaso ng COVID-19 ang lungsod sa kasalukuyan.

Nito lamang May 30, 2022, mismong si City Mayor Joseph Evangelista ang nagpaturok ng kanyang ikalawang booster shot (4th dose) ng COVID-19 vaccine para sa karagdagang proteksyon at upang ipakita sa lahat na ligtas ang pagpapabakuna laban sa sakit.

Humihina ang efficacy o ang taglay na proteksyon ng bakuna habang tumatagal laban sa COVID-19 kung kaya dapat na magpabakuna ang publiko.

Sa data na inilabas ng City Health Office kahapon, May 30, 2022, nasa 24,104 ang nabigyan na ng kanilang unang booster shot sa lungsod.

Nasa 182 naman ang nakatanggap na ng kanilang second booster shot mula ng simulan ng CHO ang pagbibigay nito ilang linggo lang ang nakalilipas.

Mababa naman ang bilang na naka tanggap ng una at ikalawang booster shots kumpara sa malaking bilang na 117,337 fully vaccinated na unang nakatanggap ng dalawang dose ng Sinovac, Pfizer, Astra Zeneca, Sputnik V at Moderna vaccines at single dose naman ng Janssen Johnson and Johnson.

Hinihikayat ni Mayor Evangelista ang lahat na samantalahin ang ginagawang Walk-In Vaccination sa City Health Office at sa mga naka schedule na bakunahan sa mga barangay ng lungsod.

Bukas para sa publiko ang primary vaccination o ang pagtuturok ng first at second dose ng bakuna pati na ang pagbibigay ng unang booster shot para sa mga A1 medical frontliners, A2 senior citizens, A3 adults with co-morbidities, A4 essential workers, A5 indigent population at maging pediatric vaccination para sa mga edad 5-11 years old at 12-17 years old.

Samantala, inuna muna ng CHO ang pagbibigay ng ikalawang booster sa mga A1, A2 at mga immune-compromised patients o ang mga indibidwal na may kanser, sumasailalim sa dialysis at iba pang maseselang karamdaman at mga Persons with Disabilities o PWD’s.

Sinabi naman ng CHO apat na buwan matapos ang unang booster shot, ay saka pa mabibigyan ng second booster shot ang magpapabakuna.

Bagamat nasa Alert Level 1 ang lungsod sa kasalukuyan, patuloy pa rin ang panawagan ni Mayor Evangelista at ng CHO sa lahat na  ugaliin pa ring magsuot ng face mask at sumunod sa mga anti-COVID19 protocols para maiwasang mahawaan ng nakamamatay na sakit. ##(CIO)

thumb image

KIDAPAWAN CITY – SISIMULAN NA ng City Government of Kidapawan ang pagbibigay ng second booster dose ng bakuna laban sa Covid19.

Nitong 9:25 ng umaga ng Lunes, May 30, 2022 ay mismong si City Mayor Joseph Evangelista ay tumanggap ng kanyang second booster dose ng Pfizer mula sa mga medical frontliners ng City Health Office.

Mismong ang alkalde ang magpapatunay na ligtas ang pangalawang booster dose laban sa sakit kung kaya at hinihikayat niya ang publiko na magpabakuna na.

Ayon pa sa mga ekspertong medical ay humihina ang efficacy o kakayahan ng bakuna laban sa sakit habang tumatagal kaya at hinihikayat ang lahat na magpabooster dose na lalo pa at madadagdagan nito ang proteksyon laban sa komplikasyon ng Covid19.

Bukas na para sa mga A1 o frontliners, A2 Senior Citizens at mga immuno-compromised individuals gaya ng may kanser, sumasailalim sa dialysis at Persons with Disabilities o PWD ang second booster shot.

Kinakailangang hindi bababa sa apat na buwan mula ng makatanggap ng unang booster shot ang pwedeng mabakunahan ng ikalawang booster shot, ayon pa sa CHO.

Kinakailangan din na dalhin ang unang booster vaccine ID para basehan ng pagbibigay ng second booster dose maliban pa sa required medical screening bago ang pagpapabakuna.

Schedule ng pagbibigay ng second booster dose ay mga araw ng Lunes, Miyerkules at Biyernes sa City Health Office. ##(CIO)

thumb image

KIDAPAWAN CITY –MAGPAPATULOY ang pagsaliksik at paglalathala ng kasaysayan ng Kidapawan City sa pag-upo ni incoming City Mayor Atty. Pao Evangelista. 

Nais ng bagong alkalde na ituloy ang proyektong sinimulan at kinomisyon ng kanyang ama na si outgoing City Mayor at ngayo’y Senior Board Member ng Cotabato Province 2nd Legislative District Joseph Evangelista.

Nitong May 27, 2022 ay personal na iniabot ni Writer-Historian Karlo  Galay David, at Propesor ng Creative Writing ng Silliman University na siyang may akda ng Journal of Philippine Local History and Heritage kung saan napabilang dito ang Kasaysayan ng Lungsod ng Kidapawan ang kopya ng kanyang akda sa bagong alkalde.

Matatandaang una ng kinomisyon  ni Mayor Evangelista si David upang magsaliksik at isulat ang kasaysayan ng lungsod dahil walang ano mang material patungkol dito ang National Historical Commission of the Philippines o NHCP. 

Personal na iniabot ni David ang kopya ng kanyang akda kay Incoming City Mayor Atty Evangelista kung saan ay itiniyak nito ang pagpapatuloy ng proyekto.

May kopya na rin nito ang NHCP ayon pa kay David.

Makakatulong ang proyekto para na rin sa kaalaman ng mga Kidapawenyo sa kung papaanong nagsimula ang bayan ng Kidapawan patungo sa pagiging component city nito sa kasalukuyan.

Mahigit sa 200 pahina ang  natapos na sa akdang Kasaysayan ng Lungsod kung saan ilan lamang sa highlights nito ay ang mga sumusunod: Timeline of Kidapawan History, Family Tree ng mga tribo, mga listahan ng municipal at city officials, pinagmulan sa salitang ‘KIDAPAWAN’, oral history ng lungsod, Kidapawan sa panahon ng mga Amerikano at Pangalawang DIgmaang Pandaigidig, pagdating ng mga mamamayang Muslim, Post War Kidapawan, at ang pagtatag ng Bayan ng Kidapawan na mula sa noon ay Empire Province of Cotabato. Sa ngayon ay patuloy pang sinusulat ni Galay ang mga sumusunod na pangyayari sa kasaysayan ng lungsod: listahan ng mga Teniente del Barrio at Kapitan ng Barangay, pagtatag ng Mt. Apo Natural Park, panahon ng People Power Revolution sa pamumuno ni OIC Mayor Florante Respicio, termino ng mga dating Mayor na sina Augusto Gana, Luis Malaluan, Rodolfo Gantuangco pati na ang kay outgoing City Mayor Joseph Evangelista at ang mga nangyari sa Cityhood ng Kidapawan mula 1998 hanggang sa kasalukuyan.##(CIO)

thumb image

KIDAPAWAN CITY (May 28, 2022) – ISA na namang parangal ang tinanggap ng Local Government Unit of Kidapawan at nadagdag sa mga awards ng LGU mula sa Department of Labor and Employment o DOLE 12.

Ito ay ang Kabuhayan Awards 2022 – Best LGU implementing DOLE Integrated Livelihood Program (DILP) na iginawad sa LGU Kidapawan sa Kabuhayan Awards Awarding Ceremony na gonanap sa New Coast Hotel, Malate, Manila noong May 27, 2022.

Tinanggap ni Public Service Employment Officer o PESO Manager Herminia Infanta ang naturang award kasama sina DOLE 12 Regional Director Ray Agravante at DOLE Provincial Director Marj Latoja.

Ayon kay Latoja, bilang partner ng DOLE ay naging mahusay ang LGU Kidapawan sa pamumuno ni City Mayor Joseph A. Evangelista sa pagpapatupad at monitoring ng DOLE DILP.

Nakapaloob dito ang mga programang pangkabuhayan para sa marginalized sector tulad ng mga self-employed individuals, seasonal workers, displaced workers, at iba pang mga manggagawa na lubhang mababa at kulang ang kinikita para sa pamilya.

Kailangang din na nasusunod ang mga itinatakda ng RA 9184 o ang “Government Procurement Reform Act” sa pagpapatupad ng proyekto para sa mga nabanggit na benepisyaryo na isa rin sa mga alituntunin sa pagbibigay ng award.

Maliban sa plaque, tumanggap din ng P40,000 cash incentive ang LGU Kidapawan mula sa  DOLE. Ang LGU Kidapawan ay lone awardee o tanging LGU na nabigyan ng naturang parangal sa buong Region 12.

Malaki naman ang naging papel ng Kidapawan PESO sa tagumpay ng DOLE -DILP dahil ito ang namahala sa pagpapatupad ng proyekto at ang kaukulang monitoring upang matiyak  na maayos itong napapakinabangan ng target beneficiaries.

Kaugnay nito, pinasalamatan ni Mayor Evangelista ang DOLE 12 sa paggawad ng award sa LGU Kidapawan kasabay ng pahayag na lalo pang pagiibayuhin ng kanyang administrasyon ang pagtulong sa mga marginalized sector.

Pinasalamatan din niya ang mga beneficiaries sa koordinasyon at suporta na nagresulta sa tagumpay ng DOLE – DILP sa Lungsod ng Kidapawan. (CIO-jscj/Photos-PESO Kidapawan)

thumb image

KIDAPAWAN CITY – MAHIGPIT na ipagbabawal ng City Government of Kidapawan ang pagdadala ng pork products sa mga aakyat ng Mt. Apo.

Ang pagbabawal ay bunsod na rin ng posibleng pagkalat ng African Swine Fever o ASF sa lugar na bago lamang nakitaan ng isang warty pig o ‘baboy ramo’ na isang vulnerable specie ng hayop na nahaharap sa extinction o malapit ng maubos kapag hindi naagapan.

Maari kasing makain ng mga baboy ramo ang pork products na kontaminado ng ASF at magresulta sa pagkakahawa ng ibang kahalintulad na hayop na maituturing na endemic sa lugar.

Ang pagbabawal ay ipinabatid ni City Tourism Supervising Officer Gillian Lonzaga sa panayam ng local media kung saan magkatuwang ang kanyang opisina at ang Office of City Veterinarian sa naturang gawain. 

Mahigpit na imomonitor, ayon pa kay Lonzaga, ang mga climbers sa pagdadala ng ipinagbabawal na pork products na dadaan sa Kidapawan trail.

Kukumpiskahin ng City Government ang naturang mga produkto at magbabayad ng kaukulang penalties ang sino mang lalabag sa regulasyon sa pagbabawal ng pagdadala ng pagkaing nagmula sa karneng baboy paakyat ng Mt. Apo, ani pa ni Lonzaga.

Sinabi din ng opisyal na ipatutupad din sa iba pang munisipyo na may mga trail paakyat sa Mt. Apo ang pagbabawal sa pagdadala ng pork product patungo sa lugar.

Kasagsagan ng Mt. Apo Summer Climb sa nakalipas na semana santa ng natuklasan ng Department of Environment and Natural Resources o DENR Region XI ang presensya ng Philippine warty pig o may scientific name na Sus philipppinensis na endemic sa lugar.

Bagama’t nahaharap sa extinction, positibo ang DENR na ang presensya ng Philippine warty pig ay patunay lamang na bumabalik na ang dating sigla ng kalikasan sa Bundok Apo. ##(CIO)

Photo Credit: DENR RXI Davao

thumb image

KIDAPAWAN CITY (May 25, 2022) – SA layuning mapahusay at mapalawak pa ang serbisyo para sa mamamayan ng lungsod, ilalaan ng City Government of Kidapawan ang abot sa P23.5M na hindi nagamit (unexpended appropriation) na pondo mula sa 20% Economic Development Fund para sa 2020-2022.

Ito ang napagkasunduan sa ginanap na City Development Council (CDC) Meeting na pinangunahan ni City Mayor Joseph A. Evangelista (CDC Chairperson)  sa Mega Tent, City Hall alas 9 ngayong umaga.

Mula sa naturang halaga na P23.5M ay ilalaan ang abot sa P4M sa street lighting project sa kahabaan ng national highway, P 6M para sa Sibawan-Mua-an Farm-to-Market Road, at para sa concreting of barangay roads ay P.13.5M na counterpart fund ng city government para sa Philippine Rural Development Projects o PRDP(8 to 10 barangays).

Nais ni Mayor Evangelista na makinabang ang mga mamamayan sa nabanggit na pondo sa pamamagitan ng reprogramming ng pondo tungo sa malinaw at makatotohanang implementasyon ng mga mahahalagang proyekto.

Dadaan naman sa pagtalakay ng Sangguniang Panglungsod ang hakbang na ito ng CDC at sa oras na maaprubahan ay agad ding sisimulan ang mga proposed projects.

Magiging bahagi naman ng flagship projects ni incoming Mayor Atty. Jose Pao Evangelista ang road concreting project kung saan target ng kanyang administrasyon na mapa-semento ang abot sa 100 meters na kalsada sa bawat barangay sa bawat taon at ang paglalagay ng mga solar lights upang ganap na magliwanag ang mga barangay.

Sa kabilang dako, naaprubahan din ang reprogramming ng pondo ng Barangay Ginatilan for CY 2022 na abot sa P200,000 para sa pagsasagawa ng road concreting project ng Purok 4 ng nasabing barangay dati ay laan para sa water system project.

Lahat ng ito ay nakapaloob sa presentation na ibinahagi ni City Planning and Development Office o CPDO Head Engr.  Divina Fuentes sa CDC meeting.

Samantala, ikinatuwa naman ng mga miyembro ng CDC ang anunsiyo ni Mayor Evangelista ang dagdag na honorarium mula P500 ay magiging P1,000 na ito bawat pagpupulong.

Pagpapakita ito konsiderasyon at pagkilala sa suporta at matibay na koordinasyon sa mga Punong-Barangay, Civil Society Organizations, at iba pang miyembro ng CDC. (CIO-jscj/if)

thumb image

KIDAPAWAN CITY – ABOT sa 100 mga bata mula sa dalawang mga barangay ng lungsod ang mabibigyan ng bagong gamit pang eskwela sa pamamagitan ng Project Angel tree ng City Government. Sa June 25, 2022 ay pangungunahan nina City Mayor Joseph Evangelista at incoming City Mayor Atty Jose Paolo Evangelista ang pamimigay ng regalo sa mga bata sa lobby ng City Hall kung saan matatagpuan ang Angel Tree. Proyekto ng City Government ang Angel Tree na naglalayong mabigyan ng tulong at matugunan ang kahilingan ng mga mahihirap na bata sa lungsod, ayon kay Aida Labina, ang focal person ng proyekto. May nakasabit na mga papel sa Angel Tree kung saan doon isinulat ng mga bata ang kanilang ‘wishes’ na karamihan ay mga bagay na kanilang kinakailangan. Pipili naman ang mga city officials sa mga nakasabit na papel at sila ang magigingn sponsor at magbibigay ng gamit na ninanais ng bawat bata. Pwede rin ang mga pribadong indibidwal o business establishments ang mag-sponsor ng mga kahilingan ng mga bata sa pamamagitan ng pagsali sa Project Angel Tree kung saan ay pwede silang pumili sa mga papel na nakasabit sa puno. Ngayong araw ng Miyerkules, May 25, 2022 ganap na alas 10 ng umaga ay bubuksan na sa publiko ang Angel Tree sa lobby ng City Hall. Maaring pumili ang sino man sa mga ‘wishes’ sa Angel Tree at maibigay ang hiling ng mga bata. Kung sakaling hindi maubos ang mga papel na nakasabit sa Angel Tree, ay mismong ang City Government of Kidapawan na ang mag-i-sponsor sa mga nalalabing wishes ng mga bata at ibibigay kaagad ang mga ito. Mga bata na na-validate ng City Government mula sa mga barangay ng Indangan at Nuangan ang target na mabigyan ng bagong gamit pang eskwela sa ilalim ng proyekto. Ilulunsad muli ang Angel Tree Project para naman sa iba pang mga bata sa mga nalalabing barangay ng Kidapawan City sa susunod na mga araw.##(CIO)

thumb image

KIDAPAWAN CITY (May 24, 2022) – ISINAGAWA ang Orientation and Organization para sa 158 na mga Person Who Used Drugs (PWUD) bilang benepisyaryo ng Sustainable Livelihood Program (SLP) ng Department of Social Welfare and Development o DSWD noong Lunes, May 23, 2022.

Pinangasiwaan ito ng City Social Welfare and Development Office (CSWDO) at ng DSWD12. Ang mga PWUD ay isa sa tatlong priority sectors ng proyekto na kinabibilangan din ng mga Solo Parents at Persons with Disability (PWD) mula sa apat na priority barangays ng lungsod na binubuo ng Poblacion, Nuangan, Mua-an, at Amas.

Layon ng programang ito na mabigyan ang mga PWUD ng pagkakataon na makapagsimulang muli at maturuan ng iba’t ibang pamamaraan upang i-manage ng maayos ang kanilang puhunan sa negosyo paghahanap na rin ng trabaho.

Sasailalim sila sa apat na sessions kabilang ang sumusunod, -Orientation and Organization, Leadership and Team Building, Financial Literacy and Entrepreneurship ng Department of Trade and Industry (DTI), at Capability Building on Occupational Safety and Health Standards and Development Values Formation na pangungunahan ng Department of Labor and Employment (DOLE).

Nanguna sa orientation ang kinatawan DSWD SLP 12 na si Michael Joseph Salera. Dumalo din sa naturang aktibidad ang focal person for PWUD na si Jenny Lynne Langoyan.

Ang nabanggit na programa ay isasagawa mula May 23 hanggang July 1, 2022 sa Lungsod ng Kidapawan.

Labis naman ang tuwa at pasasalamat ng mga benepisyaryo dahil sa tulong na kanilang natanggap lalo na’t isa sila sa mga sektor na hindi masyado nabibigyan ng mga pagkakataon sa ating lipunan nitong nagdaang mga panahon.

Ikinatuwa naman ni Kidapawan City Mayor Joseph A. Evangelista ang programa para sa mga PWUD dahil ito ay alinsunod naman sa Balik Pangarap Program Ng City Government of Kidapawan para sa mga dating nalulong sa droga na ngayon ay tuloy-tuloy na sa pagbabagong buhay. (CIO)

thumb image

KIDAPAWAN CITY (May 24, 2022) – MAPALAD ang abot sa 63 aplikante sa ginanap na JOB FAIR for Local Employment na isinabay sa Diskwento Caravan ng Dept of Trade and Industry o DTI noong May 20-22, 2022.

Ito ay matapos na agad silang mag qualify sa mga job vacancies na binuksan ng mga partner establishment/agencies, ayon kay Public Employment Service Officeo PESO Manager Herminia Infanta.

Kabilang naman ang mga sumusunod na mga partners ng PESO Kidapawan sa nabanggit na Job Fair – Hari Royal Marketing (2 qualified applicants), Toyota Kidapawan (15), Comcare (17), Sebo Massage (2), MDSI Midsayap (4), Gaisano Mall (19), at Sky Go Marketing (4) o 63 successful applicants mula naman sa kabuuang 131 aplikante na dumagsa sa aktibidad.

Malaking tulong ito sa mga naghahanap ng trabaho at sa local economy ayon pa kay Infanta dahil malaki ang pag-asa na sila ay makakapasok sa trabaho partikular na sa mga nabanggit na local establishments matapos na ma-comply ang mga required documents at final interview. 

Matatandaang bago lamang o nitong May 5, 2022 ay nagsagawa din ng Job Fair for local and overseas employment ang PESO Kidapawan sa pakikipagtulungan ng ilang mga local at national agencies at ng Department of Labor and Employment o DOLE.

Sa naturang aktibidad ay nabigyan din ng pagkakataon ang ilang mga job seekers matapos na sila ay agad na matanggap o Hired On The Spot (HOTS) habang ang ibang applicants naman ay isinalang sa final interview. (CIO-jscj/aa/vh/if)

thumb image

KIDAPAWAN CITY – HINIHIKAYAT NG City Government of Kidapawan ang lahat na magkaroon ng healthy lifestyle para maiwasang magkaroon ng Hypertension o High Blood pressure.

Ngayong buwan ng Mayo ay ginugunita ang National Hypertension Awareness Month kung saan nanguna ang City Health Office o CHO sa pagbibigay ng adbokasiya at impormasyon sa mga mamamayan laban sa mapanganib na sakit.

Kaugnay nito, nagbigay ang CHO ng isang lecture patungkol sa hypertension sa mga mamamayan ng Barangay Paco nitong May 20, 2022 na bahagi naman ng adbokasiya at pagbibigay ng mahalagang impormasyon.

Nabanggit sa naturang lecture na lubhang mapanganib ang hypertension o alta presyon lalo na kapag hindi naagapan o naipagamot.

Maari itong magresulta sa sakit sa puso at kidneys, stroke o pagbara ng ugat patungo sa utak na maaring ikamatay o ikaparalisa ng pasyente.

Maaring maiwasan ang pagkakaroon ng hypertension sa mga sumusunod na pamamaraan:

Ugaliing imonitor ng regular ang blood pressure na hindi lalagpas sa mahigit 120/80.

Kapag may hypertension na ang pasyente, dapat huwag kaligtaang uminom ng maintenance medicine para iwas atake.

Mas mainam na kumain ng maraming gulay, fiber, uminom ng maraming tubig at iwasan o limitahan ang karne, mga matataba at process food dahil ito ay lubhang matatamis, mamantika at maalat na maaring magpataas ng presyon ng dugo.

Iwasan din ang stress o matinding pagkapagod, pagpupuyat at mas mainam na mag ehersisyo ng tatlumpong minuto tatlo o apat na beses sa isang linggo.

Dapat magkaroon din ng tamang timbang ng pangangatawan.

Bawal din ang paninigarilyo at sobrang pag-inom ng nakalalasing na inumin sa mga taong may hypertension.

Mas madaling magkaroon ng hypertension ang mga nagkakaedad na, hindi physically active, overweight at kung may kapamilyang may hypertension.

Resource person ng aktibidad sina Honey Bee Sarillo, RN ng Human Resource for Health at si Marilou Capilitan, Nutrition Program Coordinator ng CHO kung saan ay ipinaliwanag nila ang medical at nutritional na aspeto sa pag-iwas sa hypertension.

Magkatuwang ang City Health Office at partner nitong With Love Jan Foundation Incorporated sa mga adbokasiya kontra hypertension at iba pang mga programang pangkalusugan.

Nagbibigay ng libreng gamot para sa hypertension ang With Love Jan lalo na sa mga senior citizens sa mga barangay.

Mismong ang CHO, Office of the City Mayor, at ang Office of the Senior Citizens Affairs o OSCA ang naghahatid nito sa mismong tahanan ng mga senior citizens.

Kaugnay nito ay pinapayuhan naman ang mga mamamayan na magpatingin agad sa kanilang mga rural health centers kung nakakaranas na ng simtomas ng hypertension gaya ng pananakit ng ulo, pagkahilo, paglabo ng paningin at pananamlay ng katawan ng maiwasan ang komplikasyon.

Ito ay libre kaya at dapat samantalahin na ng mga mamamayan ang panawagan. Dagdag pa SA lecture, isa ang alta presyon sa may mataas na morbidity cases o karaniwang mga sakit ng mamamayan hindi lamang sa lungsod, kung di sa buong bansa ayon pa sa CHO. ##(CIO)

@ 2018 Kidapawan City. All rights reserved.

Developed and Maintained by: Durian Studio