Month: July 2022

You are here: Home


thumb image

KIDAPAWAN CITY (July 20, 2022) – NANINIWALA si City Mayor Atty Jose Paolo Evangelista na ang paglahok sa sports ang magiging

daan sa pag-unlad ng mga kabataan sa lungsod.

Sinabi niya ito sa mga kasapi ng Metro Kidapawan Football Club o MKFC na nag courtesy call sa kanya nitong hapon ng July 20, 2022.

Sa pamamagitan ng sports ay nahahasa ang mga kabataan sa kahalagahan ng team work at pagkakaroon ng disiplina na kinakailangan sa pagpapaunlad pa ng kanilang sarili at ng bansa sa pangkalahatan.

Ang pagsali sa sports ay makakatulong na maiwasan ng mga kabataan ang bisyo na maaring makasira sa kanilang buhay, sinabi

 ng alkalde.

Sa pagbaba ng kaso ng COVID-19 sa kasalukuyan, ay nabigyan nito ng oportunidad ang mga kabataan na muling sumali sa mga sporting events para sa pagpapa-unlad ng kanilang mga sarili.

Bilang pagpapakita ng suporta sa MKFC ay personal na iniabot ni Mayor Evangelista ang mga bagong bola ng football para magamit sa kanilang pagsasanay.

Ang mga bagong bola ay mula sa request ni Mayor Evangelista sa Philippine Sports Commission o PSC na siyang namamahala sa sports development ng bansa.

Tiniyak naman ni Mayor Evangelista ang tuloy tuloy ang suporta sa mga kabataang Kidapawenyo na lalahok sa mga sporting events at iba’t-ibang kompetisyon na kanilang sasalihan sa hinaharap. ##(CMO-cio/lkro)

thumb image

KIDAPAWAN CITY (July 20, 2022) MAGPAPATUPAD na ng ‘Carpooling’ ang City Government of Kidapawan simula sa linggong kasalukuyan.

Layon nito na makatipid sa gastusin sa fuel expenses ang City Government para sa iba’t-ibang mga opisina nito.

Ramdam din ng City Government ang patuloy na tumataas na presyo ng produktong petrolyo kung kaya gumawa ito ng sistema sa tamang paggamit ng mga sasakyan na hindi masasakripisyo ang pagbibigay ng serbisyo, ayon kay ni City Mayor Atty Jose Paolo Evangelista.

Dagdag pa nito ang pagnanais ng City Government na mabawasan ang polusyong dulot sa kapaligiran ng mga ginagamit na mga sasakyan.

Ano mang araw ngayong linggong ito ay lalagdaan na ni Mayor Evangelista ang isang Executive Order na mag-uutos na ipatupad ang carpooling sa mga opisina ng City Hall.

Sa ilalim ng direktiba ng alkalde, inaatasan nito ang City Administrator’s Office at ang General Services Office o GSO  na magtalaga ng dalawang sasakyan bilang mga ‘All Purpose Vehicles’ na puwedeng gamitin ng alin mang departmento ng City Hall.

Tanging official travel sa loob at labas ng Kidapawan City ang paggagamitan ng naturang mga sasakyan.

Pwede ring magkasabay na gumamit nito at bumiyahe ang magkaibang mga opisina ng City Government kung saan ay sasagutin na ng Office of the City Mayor ang gastusin sa gasolina.

Bubuo ng angkop na mekanismo ang City Administrator at GSO para sa maayos na sistema ng paggamit ng mga itatalagang sasakyan.

Maliban dito ay pwede ring ipa-carpool ng iba pang departamento ang kanilang mga sasakyan para magamit din ng ibang opisina.

Magbibigay ng P50,000 cash incentive at iba pang pribilehiyo ang City Government sa mga departmentong nagpahiram ng kanilang sasakyan para gamitin sa carpooling system.

Kaugnay nito, ay tiniyak naman ni Mayor Evangelista na hindi masasakripisyo ang pagbibigay serbisyo publiko sa mamamayan ng lungsod ang ipatutupad na carpooling system ng City Government.

Hindi saklaw ng ipatutupad na Carpool EO ang mga ambulansya at emergency response vehicles at heavy equipment ng City Government. (CMO-cio/lkro)

thumb image

KIDAPAWAN CITY July 20, 2022– NAGPAABOT ng kanilang pasasalamat ang may 30 distressed Overseas Filipino Workers o OFW na taga Kidapawan City kay City Mayor Atty. Jose Paolo Evangelista sa tulong pinansyal na personal na binigay sa kanila.

Tumanggap ng tig P10,000 na tulong pinansyal ang bawat OFW na bumisita sa tanggapan ni Mayor Evangelista ngayong umaga ng July 20, 2022.

“ Ang tulong ay patunay na hindi nagpapabaya ang pamahalaan sa ating mga distressed OFW at tinutugunan ang inyong mga pangangailangan”, mensahe ni Mayor Evangelista sa mga OFW na tumanggap ng tulong Mula sa City Government at sa pamamagitan ng Department of Social Welfare and Development o DSWD.

Magsisilbing food allowance o di kaya ay gagamitin sa pagbili ng pangunahing pnagangailangan ang halagang natanggap ng bawat OFW, ito ay ayon pa kay City Government Public OFW Desk Officer o PODO Aida Labina.

Sila ang mga OFW na nakaranas ng pang-aabuso mula sa kanilang amo, naaksidente o nagkasakit sa kanilang trabaho na pinauwi ng kanilang mga employers pabalik ng Pilipinas.

Pinuri naman ni DSWD Cotabato Crisis Intervention Unit Head Rose Alcebar ang ginawang pakikipag-ugnayan sa kanila ni Mayor Evangelista para makatulong sa mga distressed OFW.

Tinuturing kasi nilang special na kaso ang pagtulong sa mga OFW lalo na at hindi sila direktang ahensyang nangangasiwa sa pagtugon sa mga pangangailangan ng mga nabanggit.

Malaking pasasalamat ang ipinaabot ng mga distressed OFW hindi lamang sa pagbibigay ng ayudang pinansyal sa kanila kungdi, sa tulong na rin ng City Government para makauwi sila ng bansa.

Matatandaang nagpaabot noon ng tulong at napauwi ni dating City Mayor at ngayon ay Cotabato 2nd District Senior Board Member Joseph Evangelista sa mga OFW na naharap sa personal na krisis habang nagta-trabaho sa ibang bansa.

Hindi lamang taga Kidapawan City ang nabigyan ng tulong kungdi, maging iba pang distressed OFW na taga ibang bayan sa lalawigan ng Cotabato ang natulungan ni dating City Mayor Joseph Evangelista. ##(CMO//lkro/cio)

thumb image

KIDAPAWAN CITY, July 19, 2022– MULING tiniyak ng Philippine Red Cross o PRC ang suporta nito sa mga adbokasiya at programa ni Kidapawan City Mayor Atty Jose Paolo Evangelista.

Nag-courtesy call ang mga opisyal ng Philippine Red Cross Cotabato Chapter kay Mayor Evangelista umaga ng Martes, July 19, 2022 sa tanggapan nito sa City Plaza.

Sumentro ang usapan ng PRC at ni Mayor Evangelista sa usapin ng humanitarian action, disaster response, relief operation, at partner in training na magiging priority programs sa partnership ng City Government of Kidapawan at ng Philippine Red Cross, ayon kay PRC Cotabato Chapter Administrator Joseph Fernandez.

Napag-usapan din ang planong pagpapatayo ng Red Cross Building malapit sa Bio-Molecular Laboratory Facility ng City Government sa may Duhat Drive ng Barangay Poblacion.

Dagdag pa ni Fernandez na maakakatulong ang nabanggit na pasilidad na alternatibong makakapagbigay ng de-kalidad na dugo sa mga pasyenteng mangangailangan nito na hindi lamang para sa mga taga Kidapawan City ngunit pati na rin sa mga karatig bayan sa Lalawigan ng Cotabato.

Si Mayor Evangelista ay ang kasalukuyang Vice Chair ng Board of Director ng Philippine Red Cross Cotabato Chapter kung kaya’t tiwala ang pamunuan nito na maisasakatuparan ang mga partnership programs ng ahensya at ng City Government. ##(CMO-cio)

thumb image

KIDAPAWAN CITY (July 19, 2022) – MAGANDANG balita ang ibinahagi ng Public Employment and Service Office o PESO kaugnay ng ginanap ng 1-day Job Fair sa Convention Center, Kidapawan City kahapon, July 18, 2022.

Walong aplikante ang agad na natanggap sa trabaho at ito ay sa mga job openings ng local partner companies.

Abot naman sa 158 ang sasailalim sa examination at final interview kung saan 134 ang local employment at 24 sa overseas o trabaho sa ibayong-dagat.

Sinabi ni PESO Kidapawan Manager Herminia C. Infanta na bahagi ito ng mandato ng kanilang tanggapan na tulungang makahanap ng angkop na trabaho ang mamamayan ng lungsod lalo na ang mga fresh graduates.

Tulad ng nagdaang mga Job Fair ay katuwang ng PESO Kidapawan ang Department of Labor and Employment o DOLE 12 at ang Department of Migrant Workers o DMW sa pagsasagawa ng aktibidad.

Pinasalamatan ni Infanta ang walong mga local partner companies na kinabibilangan ng PH Global Jet Express, Inc., Marbel Universal Trading, Inc., Alternative Network Resource Unlimited Multi-Purpose Cooperative, VXI Global Holdings, B.V., Toyota Kidapawan City, at DC Invest, Inc.

Kabilang naman sa mga overseas partner ang God’s Will International at Zontar Manpower Services, Inc.

Dinagsa naman ang naturang Job Fair ng mga job seekers mula sa Lungsod ng Kidapawan at kalapit na mga lugar kung saan umabot sa 216 ang bilang ng mga lumahok o nag-apply ng trabaho. (CIO-jscj/if)

thumb image

KIDAPAWAN CITY (July 19, 2022) – DAGDAG na kaalaman sa pag-aalaga at pagpaparami ng isdang tilapia ang nakamit ng abot sa 30 mga fish farmers sa Lungsod ng Kidapawan.

Ito ay sa ilalim ng Fisheries Cost Recovery Program ng Office of the City Agriculturist (OCA) na naglalayong palakasin ang food production and sustainability sa harap ng nagpapatuloy na pandemiya ng COVID-19, ayon kay Marissa Aton, ang City Agriculturist ng Kidapawan.

Sinabi ni Aton na mahalaga ang mga inputs na makukuha ng mga tilapia growers dahil ang grow-out stage ay may pinakamahabang panahon at may mga prosesong kailangang sundin.

Nagmula sa iba’t-ibang barangay ang mga lumahok sa 1-day training na kinabibilangan ng Balabag (2), Meohao (2), Ilomavis (5), Mua-an (2), Sudapin (1), Balindog (2), Paco (3), Onica (1), Sikitan (5), San Isidro (1), Linangkob (2), New Bohol (3), at Manongol (1).

Nagsilbing resource person sa training ang 4H Club Federation President at Vice Chairman ng Ilomavis Fisherfolks Association Darryl C. Flores. 

Ginanap ang aktibidad bago lamang sa La Villa Aquafarm, Barangay Manongol, Kidapawan City.

Matatandaang isa ang pagpapalakas ng supply ng pagkain ang tinutukan ng City Government of Kidapawan sa kasagsagan ng COVID-19 noong 2020 at 2021 at tuloy-tuloy lang ito sa administrasyon ng bagong-upong alkalde na si Mayor Atty. Jose Paolo M. Evangelista na nagsusulong din ng agri-tourism sa lungsod. (CIO-jscj/photos by OCA)

thumb image

(KIDAPAWAN CITY – July 15, 2022) IBINAHAGI ni dating Kidapawan City Mayor at ngayon ay Cotabato 2nd District Senior Board Member Joseph Evangelista sa mga DILG Officials ng Caraga Region ang matagumpay na pagpapatupad ng Local Government Support Fund – Barangay Development Support Funded Project o LGSF-BDSF sa lungsod.

Bumisita sa Lalawigan ng Cotabato ang mga DILG Officials ng Caraga ngayong umaga ng Biyernes July 15, 2022 para sa kanilang tatlong araw na benchmarking sa kung papaanong naipatupad ang mga proyekto ng LGSF-BDSF sa probinsya.

Ang LGSF-BDSF ay bahagi ng whole of nation approach ng nagdaang Duterte Administration sa ilalim ng End to Local Communist Armed Conflict o ELCAC na naglalayong ilapit ang mga programa ng pamahalaan sa mga barangay na may presensya ng mga komunistang grupo. 

Ayon kay BM Evangelista, ang Kidapawan City ang siyang may pinakamataas na accomplishment sa pagpapatupad ng BDSF-LGSF sa buong SOCCSKSARGEN Region.

Patunay rito ang 35 Mula sa  44 proyektong pangkaunlaran ng LGSF-BDSF ELCAC ang matagumpay na naipatupad sa Kidapawan City.

Mula sa P140M na pondong galing sa National Government, nasa mahigit P110 Million o 79% implementation rate na ang naipatupad na proyekto sa anim na identified barangay ng lungsod.

Mga proyekto gaya ng road concreting, rural health centers, water system, livelihood programs at iba pa ang ilan lamang sa mga proyektong naipatupad sa ilalim ng LGSF-BDSF, ayon pa kay BM Evangelista.

Pinangunahan nina FAD Chief Jocelyn C. Jayoma at LGCDD Chief Annabel F. Yangson ang mga DILG Caraga regional at provincial officials na bumisita sa lungsod.

Una na silang nag-courtesy call kay Cotabato DILG Provincial Director Ali Abdullah bago tumungo Ng Kidapawan City.

Maliban sa personal na pagbisita at pakikipag usap kay BM Evangelista ay nagtungo din ang mga DILG officials ng Caraga sa LGSF-BDSF ELCAC Project sa barangay Sikitan ng lungsod, bilang bahagi ng kanilang ocular visit 

Ang Rehiyon ng Caraga ay siyang ikalawang pinakamalaking recipient ng programa ng LGSF-BDSF ELCAC sa buong bansa na may P3.8 Billion na pondo mula sa pamahalaan.

Ito (CARAGA) ay binubuo ng mga lalawigan ng Agusan del Norte, Agusan del Sur, Surigao del Norte, Surigao del Sur at ang Province of Dinagat Islands kung saan ipatutupad ang mga LGSF-BDSF ELCAC Projects. ##(CMO-cio

thumb image

KIDAPAWAN CITY (July 14, 2022) – TARGET na mapailawan ni City Mayor Atty Jose Paolo Evangelista ang malaking bahagi ng mga komunidad sa lungsod sa kanyang unang 100 araw.

Abot sa 1,600 na mga Solar Lights ang nakatakdang ilagay ng City Government sa iba’t-ibang mga barangay ng Kidapawan City na una nang sinimulan noon pang buwan ng April 2022.

Kaugnay nito, 15 na mga 200 watt Solar lights ang inilaan para sa bawat barangay ng lungsod sa pamamagitan Ng Task Force Kahayag ng City Government of Kidapawan.

Pangunahing mabibiyayaan ng solar lighting projects ang mga residential communities sa hangaring mapanatili ang kaligtasan, at kaayusan sa mga komunidad lalo na sa gabi, ayon kay Mayor Evangelista.

P4 Million ang kabuoang halaga ng solar lights na nagmula sa P23 Million unexpended o hindi nagamit na pondo ng 20% Economic Development Fund o EDF ng City Government para sa taong 2020-2022.

Matatandaang inaprubahan ng dating City Mayor at ngayon ay Cotabato 2nd District Board Member Joseph Evangelista at ng City Development Council en banc ang paggamit ng pondo bago pa man magtapos ang kanyang administrasyon para mapakinabangan ng mga Kidapawenyos. 

Ngayong araw ng Huwebes, July 14, 2022 ay abala ang City Engineering Office sa pagkakabit ng mga bagong pailaw sa Apo Sandawa Homes Phase 3 ng Barangay Poblacion. Sa susunod na linggo ay ang Phase 1 naman ng nabanggit na subdivision ang malalagyan ng solar lights.

Malaking pakinabang ang proyektong pailaw ng City Government ayon pa sa mga residente lalo na kapag may nangyayaring unscheduled power interruption, bukod pa sa kaligtasan na ng mga residente ng lugar pagsapit ng gabi.

Nais ni Mayor Evangelista na makinabang ang mga mamamayan sa nabanggit na proyekto sa pamamagitan ng na-reprogram na pondo para sa malinaw at makatotohanang implementasyon ng mga mahahalagang proyekto.

Magsisilbing flagship project ng bagong alkalde ang street lighting kasama na ang road concreting projects kung saan target ng kanyang administrasyon na mapa-semento ang abot sa 100 meters na kalsada sa bawat barangay sa bawat taon.

Ito ay dagdag pa sa mga nakalaang farm to market roads na makakatulong sa m ga magsasaka para sa mas mabilis na pagba-byahe ng kanilang mga produkto patungo sa mga pamilihan ng lungsod ng Kidapawan at iba pang mga lugar. (CMO-cio)

thumb image

KIDAPAWAN CITY (July 12, 2022)– HINIHIKAYAT NI City Mayor Atty. Jose Paolo Evangelista ang mga magulang na ipa booster shot na laban sa COVID-19 ang kanilang mga anak sa pagsisimula ng 1st booster shot vaccination ng 12-17 year old pediatric age group sa Lungsod ng Kidapawan, ngayong araw ng Martes July 12, 2022.

Makakatulong ng malaki sa mga bata na makaiwas sa komplikasyong dulot ng COVID-19 ang booster shot lalo na at inaasahang ipatutupad na ang 100%  face-to-face instruction sa mga eskwelhanan sa pagbubukas ng panibagong school year pagsapit ng buwan ng Agosto, ayon kay Mayor Evangelista.

Target ng City Government na mabigyan ng unang booster shot ang 500 na mga bata edad 12-17 sa bawat schedule ng pagbabakuna sa mga araw ng Martes at Huwebes sa City Health Complex.

Pwede ng mabigyan ng booster shot ang mga bata edad 12-17 years old na hindi bababa sa limang buwan matapos nilang matanggap ang second dose ng primary vaccination, ayon sa CHO.

Kailangang dalhin at ipakita lamang ng mga magulang o guardian ang vaccination card ng mga bata bago magpabakuna ng booster shot.

Dadaan pa rin sa mandatory medical screening ang mga bata bago mabigyan ng booster shot.

Kaugnay nito ay patuloy pa ring magbibigay ng food packs gaya ng dressed chicken at bigas ang City Government sa bawat batang magpapabakuna ng booster shot. ##(CMO-cio)

thumb image

KIDAPAWAN (July 12, 2022) – ISANG kautusan ang nilagdaan ni Kidapawan City Mayor Atty. Jose Paolo M. Evangelista na nagbabawal sa mga local elected public officials na tulad niya na maglagay ng larawan sa mga tarpaulin, poster, at iba pang printed materials na ginagamit sa mga programa at proyekto ng pamahalaan. 

Ito ang Executive Order No. 05 (Series of 2022) na nilagdaan ni Mayor Evangelista sa ikalawang araw ng kanyang pag-upo bilang alkalde ng Lungsod ng Kidapawan noong July 1, 2022.

Nakasaad sa Section 2 ng Republic Act No. 6713 ang pagsusulong ng mataas na etika (ethics) sa hanay ng opisyal at mga manggagawa ng gobyerno at ipinapaalala na sila ay may pananagutan sa publiko kung saan kailangang maging responsible at tapat, simple o payak at laging mangibabaw ang interes ng mamamayan.

Nakasaad din sa Section 18 ng General Appropriations Act of 2022 ang pagbabawal sa paggamit ng mga pangalan, larawan, logo, at pirma ng mga elected o appointed public officials sa programa, proyekto at iba pang aktibidad ng gobyerno. 

Ganito din ang nakasaad sa Section 2.2.6 ng Commission on Audit Memorandum Circular No. 2013-004 kung saan malinaw na ipinagbabawal  ang paggamit o paglalagay ng litrato, motto, kulay o logo at iba pang pagkakakilanlan ng mga lokal na opisyal.

Kaugnay nito, mahigpit ng ipinagbabawal sa lahat ng mga lokal na opisyal (elected at appointed) ng Kidapawan ang paglalagay ng kanilang mga larawan sa mga poster, tarpaulin at iba pang gamit na may kaugnayan sa mga proyekto at programa, pati na aktibidad ng gobyerno.

Mapapatawan naman kaukulang reklamo at penalidad ang sinumang opisyal na lalabag sa nabanggit na kautusan ganundin ang mga printing shops na hindi susunod sa kautusan.

Ang Executive Order No. 05 ay epektibo mula July 1, 2022 sa Lungsod ng Kidapawan. (CMO/CIO-jscj)

@ 2018 Kidapawan City. All rights reserved.

Developed and Maintained by: Durian Studio