Mga prutas gikan Kidapawan, ibaligya na sa Cebu

GINALAUMAN man nga daghan ang produksiyon sa prutas sa buwan sa Agosto, nangita na ug pamaagi ang lokal nga kagamhanan sa dakbayan aron mabaligya ang maong mga abot bisan pa sa laing lugar sa Visayas ug Mindanao.

Milabay nga buwan sa Hunyo, personal nga nakigpulong si Mayor Joseph Evangelista, sa hugpong sa Cebu City Agri-business alang sa posibilidad nga tie-up ug aron makakuha ug merkado sa prutas nga nag gikan sa Kidapawan.

Uban sa mayor sa tigom si Cebu City councilor Arvin Arcillia, City Agriculture Officer Apple Tribunato, Market Operation head Arnel Quijano ug negosyante nga si Augustos Jun Pe.

Nanaad ang mga opisyal sa Sugbu nga tagaan ug luna sa ilang merkado ang mga prutas nga gikan sa dakbayan aron usab matabangan ang mga fruit growers ug matilawan sab sa taga Cebu ang kalami sa mga prutas sa Kidapawan.

Gipasalamatan sa Cebu City Government ang paningkamot ni Mayor Joseph Evangelista, tungod kay wala niini gidalo ang mga produkto sa dakbayan ug iyaha kining gipa ambit sa mga Sugbuhanon.

Lauman sa ulahing mga semana sa Agosto, mudagsang ang hervest sa mga prutas, labi na kay nag sunod ug pagpamulak karon ang mga prutas sama sa marang, durian, mangosteen ug rambutan.

Naatol pud ang daghang harvest alang sa tinu-ig nga selebrasyon sa dakbayan sa Timpupo Festival, asa gihatagan ug labing bili ang mga produktong abot gikan sa nagkalain-laing barangay sa dakbayan. (WAM)